UPACARA NGAWETONIN

Dumadin jadma dados kauripan sane utama yening pindayang sarwa prani sane lianan.Yadiastun sapunika,kaweruhan jadmane akeh kekirangane.Mangda mrasidayang ngentosin kekirangan ipun,jadmane patut mautsaha mangda eling tur bakti ring Sang Hyang Widhi Wasa skala lan niskala,mawinan Sang Hyang Widhi sakadi wit lan tetujon hidup.Yening menggah ring ajaran agama Hindu ,upacara ngawetonin mangda kalaksanayang,ngenem sasih apisan.

Ngawetonin ring basa Bali artin ipun ngalaksanayang upacara antuk jadma ring dumadin nyane,katemu ring palekadan nyane manut ring panca wara,sapta wara lan wuku.Yen niskalane,ngawetonin punika matetujon antuk penyucian lan pabersihan jadma sane kaupacarain.Sakemaon,yening skalane,ngawetonin punika mangda eling ring raga tur nyuksmayang dewek yening wekas numadi dados manusa luwih.Upacara ngawetonin punika katujon antuk Sang Dumadi,Bhatara Hyang Guru mangda ring dumadi ring merca pada puniki kalindungin olih Bhatara Hyang Guru.Utamin nyane,ngawetonin punika dados pancer ngingetang dirgayusa mangda jadmane pikenohing swadharman hidup.Selian nika,mangda slamet tinulus tetujon hidup kapinangguh.

Inggih sapunika kirang langkung gunane upacara ngawetonin.Yening iraga maagama Hindu sepatutnyane ngutamayang nglaksanayang upacara ngawetonin punika,yening saihang tekening nglaksanayang Hari Ulang Tahun.Mawinan weton punika ngranayang urah-arih laksana,pikenoh lan tabiat manusa ring merca pada.Yening ulang tahun wantah ngingetang tuwuh iragane sabilang taun secara taun kabisat utawi taun kalender.

Inggih sapunika sane prasida aturang titiang.Yening wenten sane ten patut ring kayun,titiang nunas geng sinampura.Mangkin titiang puputang antuk paramasanthi

RERAINAN SARASWATI

Pengetahuan inggih punika pinaka srana antuk ngeruruh tetujon urip jadmane.Pengetahuan metu saking jagat lan teknologi jadmane,punika sami mewit saking Sang Hyang Dewi Saraswati.Sabilang dina Saniscara,Wuku Watugunung,umat Hindu ring Bali nyangra dina Pengetahuan,Hari Raya Saraswati.Nika medasar antuk pawukon lan Saniscara.

Raos Saraswati mewit saking aksara saras sane maarti mengalir utawi membah lan wati maarti anak istri.Dadosne Saraswati inggih punika simbol pengetahuan,sane membah minakadi toya tukade,lan pengetahuan sane ngedotin minakadi anak istri sane ayu.

Sang Hyang Saraswati inggih punika Dewi Pengetahuan sane kalambangin antuk anak istri sane ayu sane madue empat tangan.Ring tampek Sang Hyang Dewi Saraswati wenten soan petak lan silakanta.Tangan ipun sane ngambel lontar utawi kropak,genitri sane nglambangin pengetahuan punika sane nenten putus-putus lan abadi,wina sane nglambangin pengetahuan punika nglimbakang manut ring pertumbuhan budaya,saroruta minakadi simbol kesucian.Sekar Saroruta manut ring umat Hindu ring Bali inggih punika sekar sane paling suci.Soan Petak sane nglambangin kewicaksanaan,dadosne keanggen ngemisahan sane manut wiadin tan manut.Silakanta sane nglambangin pengetahuan punika dados ngicen iraga wibawa.

Umat Hindu ring Bali nyangra Hari Raya Saraswati punika wit ngebakta sajen antuk buku-buku sane suci ring jerone soang-soang.Antuk sisya nyangra Hari Raya Saraswati ring sekolah ketah semengan lan pegawai ring kantor.Siang hari ring Hari Raya Saraswati,Umat Hindu ten dados ngwacen lan nyurat buku mawinan buku-buku punika kabantenin.Wengi ring Hari Raya Saraswati kawastanin Malam Sastra,Umat Hindu ngwacen buku-buku utamin nyane buku-buku agama ring jerone soang-soang utawi ring pura.Ring Hari Raya Saraswati punika,sane utama lan penting antuk urip jadmane inggih punika pengetahuan.Dina sadurung Hari Raya Saraswati kawastanin Pangredanan.Ring dina puniki umat Hindu mangda siaga minakadi ngumpulang buku,mekarya bebantenan muah sane lianan.

Ring paing Saraswati wenten rahina Banyu Pinaruh.Banyu sane maarti toya lan pinaruh maarti kewicaksanaan.Lian raosne,Umat Hindu mangda wicaksana mrasidayang membah sakadi toya lan maguna antuk dharma.Umat Hindu mebakti ring Sang Hyang Dewi Saraswati mangda kaicen antuk kawikanan lan kewicaksanaan.Umat Hindu ketah manjus ring segara utawi tukad lan nginum toya kum-kuman sane saking campuhan sekar lan don pandan arum.Toya kum-kuman punika becik pisan antuk kesehatan.Manut ring keyakinan umat hindu,ring dina Banyu Pinaruh sane utama lan penting inggih punika kesehatan.

Kalih rahina sesampun rahina Saraswati ring rahina Soma,Pon, Wuku Sinta kawastanin rahina Soma Ribek.Tigang dina sesampun rahina Saraswati ring rahina Anggara,Wage,Wuku Sinta kawastanin rahina Sabuh Mas.Lan petang dina sesampun rahina Saraswati ring rahina Buda,Kliwon,Wuku Sinta kawastanin rahina Pagerwesi.

PIDARTA BASA BALI

Om Swastiastu,

Sane wangian titiang Bapak Ibu guru miwah undangan sareng sami, para sisya saking sekolah lianan lan para semeton sane banget suksmayang titiang. Ngiring ngaturang suksmaning manah ring Ida Parama Wisesa, santukan antuk kertha wara nugraha Ida, irage sareng sami prasida kacunduk ring galahe mangkin. Suksma antuk galah sane sampun kapaica antuk titiang minakada panitia ring paindikane ring Hari Aksara Internasional pinanggal 8 September puniki.

Ring galahe mangkin titiang pacang ngaturang pidarta indik “Pengembangan Aksara lan Sastra Truna-Trunine ring Zamane Mangkin.” Ring paindikane puniki pacang kalaksanayang pacentokan ngewacen puisi, pidarta, lan makarya karya sastra sekadi satua bawak, puisi miwah sane lianan. Pacentokanne puniki kakapah dados kalih basa minakadi basa bali lan basa Indonesia. Lan kakapah antuk kakalih kategori minakadi kategori A sane katujon antuk sisya SMP (SLTP) lan kategori B sane katujon antuk sisya SMA (SLTA).

Tetujon paindikane inggih punika ngewaliyang semangat para truna-trunine mangdane ngangge basa sane becik. Ring zaman globalisasi sekadi mangkin, IPTEK lan ilmu pengetahuanne sami sampun sayan ngemajuan, nanging para truna-trunine mangkin sayan ninggalin budaya nulis surat lan truna-trunine lali ring tata cara ngewacen utawi mawicara sane becik. Ring penelitian sane munggah ring majalah Horizon 2005, para sisya SMU sane uning lan becik ring sastra, wau 20%. Puniki nyihnayang ring tahun ke tahun sisyane ngangge basa Bali lan basa Indonesia sane patut sayan ical. Santukan punika, ngiring iraga utamane para truna-trunine sareng sami ngange basa Bali utawi basa Indonesia sane becik lan manut ring awig-awing sane wenten.

Ainggih asapunika indik pidarta titiange, titiang nunas restu ring para ida dane sareng sami mangdane acarane puniki prasida memargi becik, Titiang nunas geng rena sinampura antuk keiwangan titiange sane tan manut ring ati soang-soang.
Antuk nyineb pidartane puniki antuk ngucapang parama santih.

Om Santih Santih Santih Om

KUMBANG

Kembange kembang

Kumbange liang

Kembange layu

Kumbange tanpa bayu



Kembang ladinge

makenyum pakenying-kenying

Kumbange paling

makenyanyengan



Kumbange pasledet

dijake ada kembange kembang?



Kembange mara kembang

Bayune nrugtug pakatugtug



Adake kumbange bulune kembung?

Ah................Luungan katibambungane



Semeng

Sunare galang

Kembange kembang

Kumbange teka magulung-gulungan

Ane kelihan ngereng

Ane cerikan ngeling pagerong paggliling



Ee....?

Apa..?

Magarang?

Apa ane garang?



Cicinge ngongkong

Blatuke ngulkul

Kembange kadung nengkul

Kumbange itek magandong



Ssssssssss.........

Capunge nyamping

kabilbil



Sledetang matane

ngedetin kenehe mati

Buin pidan buin paak mapuuk

Ah lacure

Buka kumbange kabengbeng di kakembunge



Buin pidanke buin paak mapuuk?


Olih : Agastia 75
Kaketus saking : Wijnana Sari 2

Warsa Anyar Imlek

Warsa anyar Imlek inggih punika silih sinunggil rahinan jagat para umat Tionghoa sane kelaksanayang wit rahina kapertama, rikala sasih isa-pertama kalender Tionghoa. Sane rauh rikala sasih anyar kekalih sesampune rahina sasih anyar kekalih sesampune rahina sasih kara. Rahina Imlek puniki kerayaang ring sajebag jagat, cutetne olih umat utawi jadma sane maagama Buddha.Rumasuk ring pecinan taler kadadosang rahina suci sane kautamayang majeng ring wangsa Tionghoa. Umat Tionghoane ngucapang rahina puniki antuk 春節 Chun1jie2 (festival musim semi), 農曆新年 Nong2li4 Xin1nián (warsa anyar), utawi 過年 Guo4nián.

Imlek kaserengin antuk Im lan Yang, Iwang lan patut utawi peteng lan lemah. Li magentos kelender utawi sasih. Imlek taler kagentosin Yin Li utawi Im Li sane kagentosin kalender kapisuluhan antuk sasih. Sasih punika pinaka lambang Im sane pinaka dasar wimba wong istri. Dadosne Imlek punika wantah kalender sane kaitung antuk dasar puteran bulan.

Imlek taler lumbrah kasambatang sekadi festival musim semi. Sakewanten tetep mapikenoh pikayun sekadi gugon tuwon sane ngamedalang pikenoh I manusa antuk galah lan tatigan. Sekadi puniki sida kacingakin antuk mitos nyolahang barong sai. Barong sai punika sekadi baburonan kapiwinboang sane kapercayain sida nolak utawi ngingsilang bala miwah makasami sane nenten becik.

Sadurung pinanggal siki sasih Imlek, sane sampun marabian utawi madue kulawarga. Sareng sami anggota kulawarga mereresik ring sawewengkon paumahan dane saoang-soang. Meja-meja kaanggen ngelaksanayang persembahyangan, samian kalukat. Arsa-arsa dewi-dewi katedunang tur kasiramang nganggen toya tur kalukat antuk toya sekar mangdaning bersih tur miik. Sareng sami taler ngentosin kelambi sane bersih lan anyar lan ngenahang ajeng-ajengan sane becik. Makasamian kulawarga ngerasayang bagia tur utamayang antuk rasa sayang lan paswecan Ida Sang Prama Kawi.

Imlek taler madue kapercayaan, ring rahina wengi kulawargane sami nenten masare jagi ngantosang galah-galah sane becik ngentosin warsa anyar. Risampun warsa anyar rauh para pengelingsir jagi ngaturang angpao majeng putra-putrane sami. Angpao inggih punika bungkusan mawarna barak sane ring tengahne kadagingin jinah alit utawi ageng, sane kaanggen hadiah rikala nyanggra warsa anyar Imlek. Arti ring kaicen Angpao punika, pinaka cihna sane kanggen nolak bencana ring sane jagi rauh, taler ngicenin pengarepan majeng warsa sane pacing rauh.

Ring tradisi Tionghoa, jadma sane patut ngicenin angpao punika biasane jadma sane sampun marabian utawi makuluwarga, krana marabian punika kaanggep wate, masa alit-alit tur mase duur.,lianan teken punika wenten pinangguh, krana jadmane sane sampun marabian biasane sampun mrasidayang nyalanin hidup ring masalah-masalah ekonomi. Lianan ring ngicen Angpao majeng ring alit-alit, ipun taler patut ngicen Angpao majeng ring anake sane sampun lingsir utawi pengodah druene.

Angpao punika ngelambangan kasenengan manah taler semangat sane pacing makta kasih sane becik, mawinan Angpao taler wenten ring sajeroning upacara-upacara sane rumasuk penting.Minekadi pawiwahan, wanti warsa, taler sane lianan sane madue sifat suka cita.
Asapunika minaban kapercayaan sane mapikenoh ring rahina warsa anyar Imlek, sekadi pikayun I manusa percaya antuk galah santukan iraga katampekin olih galah. Sekirang-kirangne I manusa ngucapang bagia suksma santukan wenten kapaica galah nyalanin keuripan puniki. Ring rahina puniki iraga patut mausaha mecikang raga lan nelasang makasami sane nenten manut ring agama.